रत्नागिरी शहर पोलिसांत गुन्हा दाखल
रत्नागिरी:
‘रत्नागिरी मारहाण प्रकरण’ अंतर्गत पैशांच्या व्यवहारातून एका ३६ वर्षीय तरुणाला अमानुष मारहाण करून जीवे मारण्याची धमकी दिल्याचा धक्कादायक प्रकार रत्नागिरी शहरातील नाचणे परिसरात उघडकीस आला आहे. याप्रकरणी रत्नागिरी शहर पोलीस ठाण्यात संदेश संतोष कोरडे याच्यासह एका अनोळखी व्यक्तीविरोधात गंभीर कलमांन्वये गुन्हा दाखल करण्यात आला आहे.
मार्च महिन्यातील ४ लाखांचा व्यवहार अन् व्याजाचा वाद
पोलिसांनी दिलेल्या माहितीनुसार, ही घटना २० जुलै रोजी सकाळी ११.१५ वाजल्यापासून २१ जुलै रोजी पहाटे २ वाजेपर्यंत नाचणे परिसर तसेच रत्नागिरी सिव्हिल हॉस्पिटल येथे घडली. याप्रकरणी सुरज मदन पाटील (वय ३६, सध्या रा. नाचणे, रत्नागिरी, मूळ रा. काटी, ता. इंदापूर, जि. पुणे) यांनी पोलिसांत तक्रार दाखल केली आहे.
सुरज पाटील यांनी चैताली जगदीश पाटील हिच्या वडिलांकडून चार लाख रुपये घेतले होते, जे त्यांनी मार्च महिन्यात परत केले होते. मात्र, या रकमेवरील व्याजापोटी २ लाख ४० हजार रुपये देण्याचे मान्य केले होते, ज्यावरून हा वाद निर्माण झाला.
आधी ठाणे स्थानकात अन् नंतर घरात घुसून मारहाण
फिर्यादी सुरज हे एक्साईज परीक्षेसाठी नवी मुंबई येथे गेले असताना ठाणे रेल्वे स्थानकावर चैताली पाटील, तिची आई आणि एका अनोळखी व्यक्तीने त्यांना गाठून लाथाबुक्क्यांनी मारहाण केली होती.
त्यानंतर आरोपी संदेश संतोष कोरडे (वय २४, सध्या रा. पनवेल, मूळ रा. बीड) हा एका अनोळखी व्यक्तीसह सुरज यांच्या नाचणे येथील राहत्या घरी आला आणि २५ लाखांची मागणी करू लागला. पैसे देण्यास नकार देताच आरोपीने सुरज यांच्या पोटावर बसून छातीवर ठोसे मारले आणि भिंतीवर आपटले. एवढेच नव्हे तर ५ किलो वजनाच्या गॅस सिलिंडरने पाठीवर व कमरेवर जबर मारहाण केली. या संपूर्ण मारहाणीचे मोबाईलमध्ये चित्रीकरणही करण्यात आले.
सिव्हिल हॉस्पिटलमध्ये नेतानाही गळा दाबण्याचा प्रयत्न
मारहाणीनंतर कपडे बदलण्यासाठी बेडरूममध्ये गेलेल्या सुरज यांना पुन्हा लाथ मारून शिवीगाळ करत जीवे मारण्याची धमकी देण्यात आली. यानंतर रुग्णवाहिकेतून सिव्हिल हॉस्पिटल, रत्नागिरी येथे नेत असतानाही आरोपीने सुरज यांचा गळा दाबून पोटात बुक्क्या मारल्याचा गंभीर आरोप तक्रारीत करण्यात आला आहे.
या प्रकरणी रत्नागिरी शहर पोलीस ठाण्यात गुन्हा रजिस्टर क्रमांक २४२/२०२६ अन्वये भारतीय न्याय संहिता (BNS) कलम ३३३, ११७(२), ११५(२), ३५२, ३५१(३) अंतर्गत आरोपी संदेश कोरडे व एका अनोळखी व्यक्तीविरोधात गुन्हा दाखल करण्यात आला असून, पोलीस पुढील तपास करत आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
14:16 22-07-2026
