जंतरमंतरवर आंदोलक विद्यार्थ्यांवर झालेल्या मारहाणीचा राहुल गांधींकडून तीव्र निषेध; शिक्षण पद्धतीतील त्रुटी आणि पेपर लीकप्रकरणी सरकारला धरले धारेवर
नवी दिल्ली:
Rahul Gandhi on Student Protest प्रकरणी जंतरमंतरवर विविध मागण्यांसाठी आंदोलन करणाऱ्या आणि पोलिसांच्या धक्काबुक्कीला सामोरे जाणाऱ्या आंदोलक तरुणींनी गुरुवारी संसदेत लोकसभेतील विरोधी पक्षनेते राहुल गांधी यांची भेट घेतली. या भेटीनंतर प्रसारमाध्यमांशी बोलताना राहुल गांधी यांनी केंद्र सरकारसह केंद्रीय गृहमंत्री अमित शाह आणि पंतप्रधान नरेंद्र मोदी यांच्यावर अत्यंत कठोर शब्दांत हल्लाबोल केला. “हे तरुण आज भारताच्या प्रसारमाध्यमांसमोर निर्भयपणे उभे आहेत; परंतु गृहमंत्री अमित शाह यांच्यात संसदेत किंवा इथे लोकांसमोर उभे राहून उत्तर देण्याचे धाडस नाही,” असा थेट आरोप त्यांनी केला.
राहुल गांधी म्हणाले की, त्यांनी आंदोलक तरुणांशी मनमोकळी चर्चा करून त्यांच्यावरील अत्याचाराची माहिती घेतली. आंदोलनादरम्यान तरुणींना कशी मारहाण करण्यात आली, धक्काबुक्की झाली आणि धमकावण्यात आले, हे ऐकून मन उद्विग्न होते. एका १५ वर्षांच्या मुलीकडून जबरदस्तीने माफीनामा लिहून घ्यायचा आणि मग तो स्वीकारायचा हा पूर्णपणे मूर्खपणा आहे. देशातील एक त्रुटीपूर्ण, ढासळलेली आणि निरुपयोगी ठरत असलेली शिक्षण पद्धती बदलण्याची आणि वारंवार होणारे पेपर लीक थांबवण्याची रास्त मागणी हे विद्यार्थी करत होते. त्यांनी कोणतीही हिंसा केली नसतानाही त्यांच्यावर बळाचा वापर करण्यात आला.
आपल्या भावना अत्यंत स्पष्टपणे मांडणाऱ्या या तरुणांचा देशाला आणि मला अभिमान आहे, असे सांगत राहुल गांधी यांनी या विद्यार्थ्यांचे कौतुक केले. त्यांनी संविधानाचे आणि भारताच्या भविष्याचे रक्षण करण्याचे काम केले आहे. या देशाला आज अशाच धाडसी तरुणांची गरज असल्याचे त्यांनी अधोरेखित केले.
गृहमंत्री अमित शाह यांच्यावर निशाणा साधताना विरोधी पक्षनेते म्हणाले की, विद्यार्थ्यांवर झालेल्या या हिंसेला आणि पेलेट गन चालवण्याच्या प्रकाराला थेट गृहमंत्री जबाबदार आहेत. या प्रकरणी दोनच शक्यता निर्माण होतात – पहिली म्हणजे, पोलिसांकडून आंदोलकांवर असा हिंसाचार होत आहे याची त्यांना माहिती नव्हती, जे त्यांच्या अकार्यक्षमतेचे लक्षण आहे; आणि दुसरी म्हणजे, त्यांनी स्वतःच या मुलांवर बळप्रयोग करण्याचे आणि पेलेट गन चालवण्याचे आदेश दिले होते, ज्याचा अर्थ ते दोषी आहेत. कोणत्याही परिस्थितीत गृहमंत्री या घटनेच्या जबाबदारीपासून पळ काढू शकत नाहीत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:53 06-08-2026
