रस्त्यावरील खड्ड्यांमुळे १० ते १२ गावांचा संपर्क विस्कळीत; १५ ऑगस्टपूर्वी काम सुरू करण्याची मागणी
संगमेश्वर:
Aravali Makhajan Road Repair च्या गंभीर प्रश्नावरून संगमेश्वर तालुक्यातील आरवली ते माखजन या प्रमुख रस्त्याची कमालीची दुरवस्था झाली असून, प्रशासनाने १५ ऑगस्टपूर्वी या रस्त्याची दुरुस्ती न केल्यास स्वातंत्र्यदिनी तीव्र आंदोलन छेडण्याचा इशारा पंचायत समितीचे माजी सदस्य जाकीर शेकासन यांनी दिला आहे.
आरवली-माखजन मार्गावर ठिकठिकाणी मोठमोठे खड्डे पडल्याने वाहतूक पूर्णपणे विस्कळीत झाली आहे. गेल्या दोन महिन्यांपासून हा रस्ता अत्यंत बिकट अवस्थेत आहे. यामुळे या मार्गावरून प्रवास करणारे शाळकरी विद्यार्थी, रुग्णवाहिका आणि दैनंदिन प्रवास करणाऱ्या हजारो नागरिकांना नाहक हाल सोसावे लागत आहेत. खड्ड्यांमुळे परिसरातील सुमारे १० ते १२ गावांचा मुख्य शहराशी असलेला संपर्क तुटल्यासारखा झाला आहे.
या रस्त्याच्या दुरवस्थेबाबत वारंवार तक्रारी करूनही प्रशासनाकडून अद्याप कोणतीही ठोस दुरुस्तीची कारवाई झालेली नाही. प्रशासनाने याप्रकरणी तातडीने लक्ष देऊन १५ ऑगस्टपूर्वी खड्डे बुजवून रस्ता वाहतुकीसाठी सुस्थितीत करावा, अन्यथा स्वातंत्र्यदिनी रस्त्यावर उतरून शांततामय मार्गाने आंदोलन करण्यात येईल, असा स्पष्ट इशारा जाकीर शेकासन यांनी प्रसिद्धीपत्रकाद्वारे दिला आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:57 06-08-2026
