सामाजिक कार्यातून परतताना झाला दुर्दैवी अंत
रत्नागिरी: रत्नागिरीचे माजी उपनगराध्यक्ष तसेच भारतीय जनता पक्षाचे दक्षिण रत्नागिरीचे माजी जिल्हाध्यक्ष राजेश सावंत (वय ५५) यांच्या पार्थिवावर गुरुवारी, ६ ऑगस्ट रोजी रत्नागिरी येथील स्मशानभूमीत शोकाकुल वातावरणात अंत्यसंस्कार करण्यात आले. ५ ऑगस्टच्या रात्री नऊच्या सुमारास रत्नागिरीकडे येत असताना प्रवासातच त्यांना हृदयविकाराचा तीव्र झटका आला, ज्यामध्ये त्यांचे आकस्मिक निधन झाले.
एका रुग्णाला कोल्हापूर येथील रुग्णालयात उपचारासाठी दाखल करून त्याच्या पुढील उपचारांची सर्व व्यवस्था लावून ते रत्नागिरीकडे परतत होते. प्रवासादरम्यान त्यांना अस्वस्थ वाटू लागल्याने सोबत असलेल्या व्यक्तींनी त्यांना तातडीने पाली येथील उपजिल्हा रुग्णालयात दाखल केले. मात्र, तेथील वैद्यकीय अधिकाऱ्यांनी तपासणीअंती त्यांना मृत घोषित केले.
पक्षसंघटना बांधणीतील मोलाचे योगदान
राजेश सावंत यांनी रत्नागिरीत पक्षसंघटना मजबूत करण्यासाठी अनेक वर्षे महत्त्वपूर्ण भूमिका बजावली. २००४ मध्ये जेव्हा राज्याचे पालकमंत्री उदय सामंत यांनी पहिल्यांदा विधानसभा निवडणूक लढवली होती, तेव्हा सावंत यांनी त्यांना मोठे सहकार्य केले होते. पुढे १० वर्षांनी उदय सामंत यांनी शिवसेनेत प्रवेश केला, तेव्हा सावंत यांनीही शिवसेनेत प्रवेश केला होता.
परंतु, नंतरच्या काळात मतभेद झाल्यामुळे सावंत यांनी आपल्या नगरसेवकपदाचा आणि शिवसेनेचा राजीनामा दिला. शिवसेनेतून बाहेर पडल्यानंतर त्यांनी भारतीय जनता पक्षात प्रवेश केला आणि दक्षिण रत्नागिरी जिल्हाध्यक्षपदाची जबाबदारी यशस्वीपणे सांभाळली.
नैतिकतेच्या भूमिकेतून दिला होता राजीनामा
गेल्या वर्षी नोव्हेंबर महिन्यात राजेश सावंत यांनी भाजपच्या जिल्हाध्यक्षपदाचा तडकाफडकी राजीनामा देऊन सर्वांनाच आश्चर्याचा धक्का दिला होता. त्यांची कन्या शिवानी माने या भाजपमधून शिवसेना (उद्धव बाळासाहेब ठाकरे) पक्षात गेलेले ज्येष्ठ नेते बाळ माने यांची सून आहेत. शिवानी यांनी ‘उबाठा’ गटाकडून नगराध्यक्षपदाची निवडणूक लढवण्याचा निर्णय घेतला होता. कन्या विरोधी पक्षातर्फे निवडणूक लढवत असल्याने केवळ नैतिकतेची भूमिका जपण्यासाठी सावंत यांनी स्वतः जिल्हाध्यक्षपदाचा राजीनामा दिला होता. या राजीनाम्यानंतर ते गेल्या काही दिवसांपासून सक्रिय राजकारणापासून अलिप्त राहिले होते.
त्यांच्या या आकस्मिक निधनामुळे रत्नागिरीच्या राजकीय आणि सामाजिक वर्तुळात मोठी पोकळी निर्माण झाली असून सर्वत्र तीव्र हळहळ व्यक्त केली जात आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
08:06 07-08-2026
