‘मिशन लक्षवेध’ उपक्रमांतर्गत सुवर्णसंधी; जिल्हा क्रीडा अधिकारी विजय शिंदे यांचे आवाहन
रत्नागिरी: पुणे बालेवाडीत आज मुलींच्या हॉकीसाठी पुन्हा निवड चाचणी आयोजित करण्यात आली असून, रत्नागिरी जिल्ह्यातील जास्तीत जास्त पात्र महिला खेळाडूंनी या सुवर्णसंधीचा लाभ घ्यावा, असे आवाहन जिल्हा क्रीडा अधिकारी विजय शिंदे यांनी केले आहे.
राज्यातील क्रीडा विकासाला चालना देण्यासाठी राबवण्यात येणाऱ्या ‘मिशन लक्षवेध’ उपक्रमांतर्गत पुणे विभागीय क्रीडा निपुणता केंद्रासाठी हॉकी (मुली) खेळाची निवड चाचणी ७ ऑगस्ट रोजी म्हाळुंगे-बालेवाडी, पुणे येथील शिवछत्रपती क्रीडा संकुलात सकाळी १० वाजता होणार आहे.
अल्प प्रतिसादामुळे पुन्हा चाचणीचे आयोजन
पुणे विभागाच्या क्रीडा निपुणता केंद्रासाठी यापूर्वी २३ व २४ मार्च रोजी ॲथलेटिक्स, शुटींग, रोईंग, कुस्ती, टेबल टेनिस व हॉकी या सहा खेळांची निवड चाचणी झाली होती. मात्र, त्यावेळी हॉकी (मुली) या खेळासाठी अल्प प्रतिसाद मिळाल्यामुळे आता केवळ मुलींच्या हॉकीसाठी ही चाचणी नव्याने घेण्यात येत आहे.
निवड चाचणीसाठी पात्रता, अटी व आवश्यक बाबी:
- वयोमर्यादा: संबंधित वर्षाच्या ३१ डिसेंबर रोजी २५ वर्षांच्या आतील मुले/मुली.
- क्रीडा अर्हता: अधिकृत राष्ट्रीय स्पर्धेत सहभाग घेतलेला असावा किंवा राज्यस्तरीय स्पर्धेत प्राविण्य मिळवलेले असावे.
- साहित्य व कागदपत्रे: निवड चाचणीसाठी येताना खेळाडूंनी स्वतःचे क्रीडा साहित्य सोबत आणणे अनिवार्य आहे, तसेच आवश्यक कागदपत्रांच्या मूळ प्रती (Original Documents) सोबत ठेवणे आवश्यक आहे.
अधिक माहितीसाठी खेळाडूंनी शिवछत्रपती क्रीडा संकुल येथील प्रतिनिधी वैशाली सूळ (७४४७४९१८८८) किंवा विव्हेंडा डिकोस्टा यांच्याशी संपर्क साधावा.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
08:44 07-08-2026
