बीसीसीआयच्या वैद्यकीय पथकाकडून फिटनेसवर बारीक लक्ष; श्रीलंकेच्या दौऱ्यापूर्वी टीम इंडियाच्या अडचणीत वाढ
मुंबई: Team India Injury Crisis (भारतीय क्रिकेट संघातील खेळाडूंची दुखापत): भारतीय क्रिकेट संघ सध्या मोठ्या आणि गंभीर दुखापतींच्या संकटाचा सामना करत आहे. एकाच वेळी तब्बल १३ प्रमुख आणि नवोदित खेळाडू विविध दुखापतींमुळे बंगळुरूमधील सेंटर ऑफ एक्सलन्स (CoE) येथे रिहॅबिलिटेशन (पुनर्वसन) प्रक्रियेतून जात आहेत.
भारतीय क्रिकेट नियामक मंडळाच्या (BCCI) वैद्यकीय पथकाकडून या सर्व खेळाडूंच्या फिटनेसवर अहोरात्र आणि अत्यंत बारकाईने लक्ष ठेवण्यात येत असून, त्यांना आगामी महत्त्वाच्या मालिकांपूर्वी लवकरात लवकर मैदानावर परत आणण्यासाठी सर्वतोपरी प्रयत्न सुरू आहेत. जसप्रीत बुमराह, हार्दिक पांड्या यांसारख्या स्टार खेळाडूंच्या दुखापतींमुळे आगामी श्रीलंका दौऱ्यापूर्वी भारतीय संघासमोर मोठे आव्हान उभे राहिले आहे.
हे १३ खेळाडू सध्या आहेत CoE मध्ये रिहॅबखाली:
सध्या बंगळुरू येथील सेंटर ऑफ एक्सलन्समध्ये रिहॅबिलिटेशन घेणाऱ्या खेळाडूंमध्ये खालील खेळाडूंचा समावेश आहे:
- जसप्रीत बुमराह: इंग्लंडविरुद्धच्या तिसऱ्या वनडेनंतर ३० जुलै रोजी बुमराह CoE मध्ये दाखल झाला असून, त्याची दुखापत ही भारतीय संघासाठी सर्वात मोठी चिंता मानली जात आहे.
- हार्दिक पांड्या: डाव्या मांडीच्या क्वाड्रिसेप्सच्या दुखापतीतून सावरत असून, त्याने ८० ते ९० टक्के वेगाने आठवड्याला १२ ते १५ षटके गोलंदाजीचा सराव सुरू केला आहे.
- नितीश कुमार रेड्डी: डाव्या मांडीच्या दुखापतीतून सावरत असून, तो सध्या ‘रिटर्न टू स्किल्स’ टप्प्यात पोहोचला आहे.
- साई सुदर्शन: नेट्समध्ये ७५ मिनिटे फलंदाजीचा सराव सुरू केला असून क्षेत्ररक्षण आणि रनिंगही सुरू केली आहे.
- हर्षित राणा: उजव्या हॅमस्ट्रिंगच्या दुखापतीमुळे २० जुलैपासून CoE मध्ये उपचाराधीन आहे.
- वॉशिंग्टन सुंदर: उजव्या हॅमस्ट्रिंगच्या दुखापतीमुळे CoE मध्ये दाखल असून त्याने हळूहळू जॉगिंगला सुरुवात केली आहे.
- वरुण चक्रवर्ती: डाव्या हॅमस्ट्रिंगच्या दुखापतीमुळे सध्या रिहॅबमध्ये असून ६ षटके स्पॉट बॉलिंग टाकत आहे.
- आकाशदीप: पाठीच्या खालच्या भागातील स्ट्रेस फ्रॅक्चरमधून सावरत असून प्रत्यक्ष क्रिकेट वर्कलोडकडे त्याची वाटचाल सुरू आहे.
- हिमांशू सिंह: उजव्या गुडघ्याच्या दुखापतीमुळे २८ जुलैपासून कोणतीही अडचण न येता स्पॉट बॉलिंग करत आहे.
- अशोक शर्मा: पाठीच्या तीव्र वेदनांमुळे या १३ खेळाडूंमध्ये त्याची दुखापत सर्वात गंभीर मानली जात आहे.
- सुयश शर्मा: दोन्ही गुडघ्यांतील समस्येमुळे २८ जुलै रोजी PRP इंजेक्शन देण्यात आले आहे.
- युद्धवीर सिंह: उजव्या खांद्याच्या दुखापतीत मोठी सुधारणा झाली असून स्ट्रेंथ ट्रेनिंग सुरू आहे.
- रियान पराग: उजव्या खांद्याच्या शस्त्रक्रियेनंतर स्ट्रेंथ आणि कंडिशनिंग प्रोग्राम सुरू आहे, मात्र पुनरागमनाची वेळ अद्याप अनिश्चित आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:35 08-08-2026
