मुख्यमंत्री देवेंद्र फडणवीस यांच्या हस्ते ऑनलाईन निधी वितरित; उर्वरित केवायसी पूर्ण शेतकऱ्यांना लवकरच लाभ मिळण्याची सहकारमंत्र्यांची माहिती
पुण्यश्लोक अहिल्यादेवी होळकर शेतकरी कर्जमुक्ती योजनेच्या महाराष्ट्र शासन (Government of Maharashtra) दुसऱ्या टप्प्यातील हप्ता नुकताच ऑनलाईन पद्धतीने जारी करण्यात आला आहे. या टप्प्यामध्ये राज्यातील ६,३६,०३६ पात्र शेतकऱ्यांना एकूण ५,०८६ कोटी रुपयांची कर्जमुक्ती थेट त्यांच्या खात्यावर वितरित करण्यात आली आहे. सह्याद्री अतिथीगृह येथे मुख्यमंत्री देवेंद्र फडणवीस यांच्या हस्ते, उपमुख्यमंत्री सुनेत्रा अजित पवार आणि सहकार मंत्री बाबासाहेब पाटील यांच्या प्रमुख उपस्थितीत हा निधी ऑनलाईन पद्धतीने वर्ग करण्यात आला.
राज्यात १२ लाखांहून अधिक शेतकऱ्यांना कर्जमुक्तीचा लाभ
मुख्यमंत्री देवेंद्र फडणवीस आणि सहकार मंत्री बाबासाहेब पाटील यांनी दिलेल्या माहितीनुसार, या योजनेअंतर्गत आतापर्यंत एकूण १२ लाख ५८ हजार २४३ शेतकऱ्यांना १० हजार ११५ कोटी रुपयांच्या कर्जमुक्तीचा प्रत्यक्ष लाभ मिळाला आहे. राज्यातील एकूण १७ लाख पात्र शेतकऱ्यांपैकी आतापर्यंत १३.७० लाख कर्जखात्यांचे आधार प्रमाणीकरण (KYC) पूर्ण झाले आहे. केवायसी पूर्ण झालेल्या उर्वरित १ लाख शेतकऱ्यांना लवकरच लाभ दिला जाईल, तर उर्वरित ४ लाख शेतकऱ्यांनी तातडीने केवायसी पूर्ण करण्याचे आवाहन सहकार विभागाने केले आहे.
दुसऱ्या टप्प्यातील विभागनिहाय लाभार्थ्यांची आकडेवारी
दुसऱ्या टप्प्यात वितरित करण्यात आलेल्या ५,०८६ कोटी रुपयांच्या निधीचे विभागनिहाय विवरण खालीलप्रमाणे आहे:
- छत्रपती संभाजीनगर विभाग: ३ लाख ०२ हजार २७३ शेतकऱ्यांना २,२८४ कोटी रुपये
- अमरावती विभाग: १ लाख ४५ हजार ८०८ शेतकऱ्यांना १,२०८ कोटी रुपये
- नाशिक विभाग: ८४ हजार ८१३ शेतकऱ्यांना ७५६ कोटी रुपये
- पुणे विभाग: ४९ हजार २२४ शेतकऱ्यांना ४१७ कोटी रुपये
- नागपूर विभाग: ४४ हजार ८६४ शेतकऱ्यांना ३६६ कोटी रुपये
- कोकण विभाग: ९ हजार ०५४ शेतकऱ्यांना ५४ कोटी रुपये
पारदर्शक पद्धतीने राबवल्या जाणाऱ्या या योजनेतील लाभ वितरण प्रक्रिया वेगाने सुरू असून, पात्र लाभार्थींची संख्या सातत्याने अद्ययावत केली जात आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:36 25-08-2026
