पडवे येथील जवाहर नवोदय विद्यालयात मोफत प्रवेशाची संधी; पालकांसाठी हेल्प डेस्क सुरू
रत्नागिरी (विशेष बातमीदार): राजापूर तालुक्यातील पडवे येथील ‘पीएम श्री जवाहर नवोदय विद्यालयात’ शैक्षणिक सत्र २०२७-२८ साठी इयत्ता ९ वी आणि ११ वी मधील रिक्त जागांच्या पार्श्वभूमीवर निवड प्रवेश परीक्षेची (LEST) ऑनलाईन अर्ज प्रक्रिया सुरू झाली आहे. इच्छुक आणि पात्र विद्यार्थ्यांना येत्या ३० सप्टेंबरपर्यंत पूर्णपणे मोफत ऑनलाईन अर्ज सादर करता येणार आहेत. ही प्रवेश परीक्षा १० एप्रिल रोजी आयोजित करण्यात येणार असून जिल्ह्यातील जास्तीत जास्त विद्यार्थ्यांनी या संधीचा लाभ घ्यावा, असे आवाहन प्राचार्य एन. के. एफ. ठाकूर यांनी केले आहे.
Jawahar Navodaya Vidyalaya Admission 2027-28: १०० टक्के मोफत निवासी शिक्षण
हे विद्यालय केंद्र सरकारच्या शिक्षण मंत्रालयांतर्गत १०० टक्के अनुदानित सहशैक्षणिक निवासी विद्यालय आहे. या ठिकाणी निवड झालेल्या विद्यार्थ्यांना मोफत शिक्षण, वसतिगृह आणि भोजनाची उत्तम सोय उपलब्ध करून दिली जाते.
प्रवेशासाठी पात्रता व अटी:
- रहिवास दाखला: अर्जदार विद्यार्थी हा रत्नागिरी जिल्ह्याचा मूळ रहिवासी असणे आवश्यक आहे.
- शैक्षणिक पात्रता: इयत्ता ९ वीच्या प्रवेशासाठी विद्यार्थी सध्या ८ वीत, तर इयत्ता ११ वीच्या प्रवेशासाठी सध्या १० वीत शासकीय किंवा शासनमान्य शाळेत शिकत असावा.
अर्ज प्रक्रिया आणि संपर्क:
विद्यार्थ्यांना ऑनलाईन अर्ज भरण्यासाठी अधिकृत लिंक्स उपलब्ध करून देण्यात आल्या आहेत:
- इयत्ता ९ वी अर्ज लिंक:
[https://cbseitms.nic.in/2026/nvsix_9](https://cbseitms.nic.in/2026/nvsix_9) - इयत्ता ११ वी अर्ज लिंक:
[https://cbseitms.nic.in/2026/nvsxi_11](https://cbseitms.nic.in/2026/nvsxi_11)
पालकांच्या सुविधेसाठी विद्यालयात मोफत ‘हेल्प डेस्क’ सुरू करण्यात आला आहे. प्रवेश प्रक्रियेबाबत अधिक माहितीसाठी परीक्षा प्रमुख आर. ए. पाटील (९४२३३३२८८१) यांच्याशी संपर्क साधावा, असे प्रशासनाकडून कळवण्यात आले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
09:34 08-09-2026
