१५ वर्षांत केवळ ९४ टक्के काम पूर्ण; कंत्राटदारांना काळ्या यादीत टाकणार असल्याचा केंद्रीय मंत्र्यांचा इशारा
पणजी/मुंबई:
Nitin Gadkari on Mumbai – Goa Highway: मुंबई-गोवा महामार्गाच्या रुंदीकरणाला होणाऱ्या विलंबाबद्दल केंद्रीय रस्ते वाहतूक आणि महामार्ग मंत्री नितीन गडकरी यांनी तीव्र खंत व्यक्त केली आहे. “या महामार्गाच्या कामाला होणाऱ्या विलंबाची मला लाज वाटते. हे काम २०१६ पर्यंत पूर्ण होणे अपेक्षित होते, परंतु १५ वर्षांनंतरही केवळ ९४ टक्केच काम पूर्ण झाले आहे,” असे रोखठोक विधान नितीन गडकरी यांनी पणजी येथील सहा पदरी उन्नत मार्गाच्या उद्घाटन समारंभात केले.
कंत्राटदारांना काळ्या यादीत टाकण्याचा इशारा
महामार्गाच्या संथ गतीबद्दल संताप व्यक्त करताना गडकरी म्हणाले की, जेव्हा हा महामार्ग पूर्ण होईल, तेव्हा मी याच्या उद्घाटन समारंभाला उपस्थित राहणार नाही. निकृष्ट आणि संथ काम करणाऱ्या कंत्राटदारांना काळ्या यादीत टाकण्याचा विक्रम आपल्याला प्रस्थापित करायचा असल्याचे त्यांनी स्पष्ट केले. या वर्षी २२ जुलै रोजी राज्यसभेत माहिती देताना त्यांनी सांगितले होते की, गेल्या तीन वर्षांत राष्ट्रीय महामार्ग बांधकामातील निकृष्ट दर्जाच्या कामासाठी १०३ कंत्राटदार आणि कंपन्यांना दंड ठोठावून काळ्या यादीत टाकण्यात आले आहे.
१५ वर्षांपासून रखडलेला प्रकल्प आणि सुरक्षेचे प्रश्न
मुंबई-गोवा महामार्गाच्या रुंदीकरणाचे काम २०११ मध्ये सुरू झाले होते. या ४४० किलोमीटरच्या पट्ट्यातील ९४ टक्के काम पूर्ण झाले असले, तरी खड्डे, पाणी साचणे, दुरुस्ती आणि वाहतूक कोंडी यांसारख्या समस्या आजही कायम आहेत. या महामार्गावरील खारपाडा टोल प्लाझावर मे महिन्यात टोल वसुली सुरू झाली असली, तरी अनेक भागात अद्याप सुधारणांचे काम सुरूच आहे. २०२१ मध्ये या महामार्गावरील एक उड्डाणपूल कोसळल्यामुळे प्रवाशांच्या सुरक्षेबाबत गंभीर प्रश्न निर्माण झाले होते.
विलंबाची मुख्य कारणे
हा महामार्ग मूळतः २०१६ पर्यंत पूर्ण होणे अपेक्षित होते. मात्र, भूसंपादन, बांधकामापूर्वीच्या परवानग्या आणि कंत्राटदारांच्या आर्थिक अडचणींमुळे प्रकल्पाला वारंवार विलंब झाला. कोकण प्रदेशातून मुंबईला गोव्याशी जोडणारा हा महामार्ग महाराष्ट्रात ४६० किलोमीटर लांबीचा असून पर्यटन व स्थानिक व्यापाराच्या दृष्टीने अत्यंत महत्त्वाचा मानला जातो.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:13 11-09-2026
