रत्नागिरी जिल्हा वैश्य वाणी समाज सेवा संस्थेच्या सदस्यपदी मोहिंदर (राजा) बामणे यांची नियुक्ती; तालुकाप्रमुख व संघटना संपर्कप्रमुख पदाचीही धुरा

अध्यक्ष डॉ. विकास शेट्ये यांच्याकडून नियुक्तीपत्र प्रदान; वीरेंद्र वणजू व सौरभ मलुष्टे यांचाही जिल्हा संघटनेतर्फे विशेष सत्कार

रत्नागिरी : रत्नागिरी जिल्हा वैश्य वाणी समाज सेवा संस्थेच्या सदस्यपदी रत्नागिरी येथील मोहिंदर उर्फ राजा बामणे यांची एकमुखाने नियुक्ती करण्यात आली आहे. जिल्हा संघटनेचे क्रियाशील, तत्पर आणि समाजासाठी अहोरात्र झटणारे अध्यक्ष डॉ. विकास शेट्ये व प्रमुख पदाधिकाऱ्यांनी स्वतः रत्नागिरीत येऊन राजा बामणे यांना नियुक्तीपत्र प्रदान करत या निवडीची अधिकृत घोषणा केली.

हेमंत वणजू यांच्या शिफारसीला अध्यक्ष डॉ. विकास शेट्ये यांचा तत्पर प्रतिसाद :

वैश्य समाजाच्या जिल्हा संघटनेसाठी रत्नागिरी तालुक्यातून सक्रियपणे काम करणाऱ्या एका अभ्यासू आणि उच्चशिक्षित कार्यकर्त्याची गरज भासत होती. यासाठी ‘रत्नागिरी खबरदार’चे संपादक हेमंत वणजू यांनी सूचक म्हणून राजा बामणे यांच्या नावाची शिफारस केली होती. या सूचनेला सकारात्मक प्रतिसाद देत डॉ. विकास शेट्ये यांनी संस्थेचे धडाडीचे सचिव श्रीनाथ खेडेकर यांच्याशी सविस्तर चर्चा करून त्यांची संमती घेतली आणि पदाधिकाऱ्यांसह रत्नागिरी गाठून ही नियुक्ती जाहीर केली.

तालुकाप्रमुख व संपर्कप्रमुख पदाची दुहेरी जबाबदारी :

मोहिंदर उर्फ राजा बामणे हे स्वतः एम.एस्सी. (M.Sc.) पदवीधर असून उच्चशिक्षित, सुसंस्कृत आणि उमदे व्यक्तिमत्त्व म्हणून परिचित आहेत. आपल्या व्यवसायाच्या माध्यमातून त्यांचा संपूर्ण रत्नागिरी तालुक्यात दांडगा जनसंपर्क आहे. त्यांच्या या दांडग्या संपर्काचा आणि अनुभवाचा फायदा समाजाच्या संघटनात्मक बांधणीसाठी व्हावा, या उद्देशाने डॉ. विकास शेट्ये यांनी बामणे यांच्यावर सदस्यपदासोबतच ‘रत्नागिरी तालुकाप्रमुख’ आणि ‘संघटना संपर्कप्रमुख’ अशी दुहेरी व महत्त्वाची जबाबदारी सोपवली आहे.

वीरेंद्र वणजू व सौरभ मलुष्टे यांचा विशेष सत्कार :

याच कार्यक्रमाच्या औचित्याने, ऐतिहासिक ‘राधाकृष्ण मंदिर वैश्य संस्थे’च्या नूतन अध्यक्षपदी निवड झालेले ज्येष्ठ बांधकाम व्यावसायिक वीरेंद्र वणजू तसेच उपाध्यक्षपदी निवड झालेले नगरसेवक सौरभ मलुष्टे यांचा जिल्हा संघटनेचे अध्यक्ष डॉ. विकास शेट्ये यांच्या शुभहस्ते शाल व पुष्पगुच्छ देऊन विशेष सत्कार करण्यात आला.

मान्यवरांची प्रमुख उपस्थिती :

या नियुक्ती व सत्कार सोहळ्याप्रसंगी संस्थेचे खजिनदार नरेंद्र बेलवलकर, सदस्य श्रीकृष्ण जागुष्टे, कौस्तुभ भिंगार्डे, अनंत दामुष्टे, ‘रत्नागिरी खबरदार’चे संपादक हेमंत वणजू, राधाकृष्ण वैश्य संस्थेचे अध्यक्ष वीरेंद्र वणजू, उपाध्यक्ष सौरभ मलुष्टे, उद्योजक दिनेश जठार, सुप्रसिद्ध अभिनेते सुनील बेंडखळे यांच्यासह समाजातील मान्यवर मोठ्या संख्येने उपस्थित होते.

समाजात आनंदाचे वातावरण :

एका सुशिक्षित, संवेदनशील आणि कार्यक्षम तरुणाला जिल्हा संघटनेच्या मुख्य प्रवाहात संधी दिल्याबद्दल संपूर्ण वैश्य समाजातून आनंद व्यक्त होत असून, अध्यक्ष डॉ. विकास शेट्ये, सचिव श्रीनाथ खेडेकर व सर्व जिल्हा पदाधिकाऱ्यांचे सर्व स्तरांतून भरभरून कौतुक केले जात आहे.