नारळ व सुपारीसाठी १५ नोव्हेंबर तर आंबा, काजूसाठी ३० नोव्हेंबरपर्यंत मुदत; शेतकऱ्यांसाठी फळबागेची जिओ टॅगिंग नोंदणी बंधनकारक
Ratnagiri Fruit Crop Insurance Scheme: शेतकऱ्यांच्या फळपिकांना हवामानातील बदलांमुळे होणाऱ्या धोक्यांपासून संरक्षण मिळावे आणि नैसर्गिक नुकसानीच्या वेळी आर्थिक भरपाई उपलब्ध व्हावी, यासाठी कृषी विभागातर्फे ‘पुनर्रचित हवामानावर आधारित फळपीक विमा योजना’ राबविण्यात येत आहे. यंदापासून या महत्त्वपूर्ण योजनेमध्ये आंबा आणि काजू पिकांसोबतच कोकणातील महत्त्वाच्या नारळ आणि सुपारी या पिकांचाही समावेश करण्यात आला असून, या दोन्ही पिकांसाठी विमा अर्ज करण्यास मुदतवाढ देण्यात आली आहे.
विमा संरक्षित रक्कम आणि हप्ता रचना
कृषी विभागाकडून जाहीर करण्यात आलेल्या माहितीनुसार, नारळ आणि सुपारी पिकांसाठी विमा हप्ता व संरक्षण रकमेचे गणित खालीलप्रमाणे आहे:
नारळ पीक: या पिकासाठी प्रति हेक्टर विमा संरक्षित रक्कम १ लाख ७० हजार रुपये असून, शेतकऱ्यांसाठी भरावयाचा विमा हप्ता ८,५०० रुपये प्रति हेक्टर इतका आहे.
सुपारी पीक: या पिकासाठी प्रति हेक्टर विमा संरक्षित रक्कम १ लाख रुपये असून, शेतकऱ्यांसाठी विम्याचा हप्ता ५ हजार रुपये प्रति हेक्टर निश्चित करण्यात आला आहे.
अर्ज करण्याची अंतिम मुदत
आंबा व काजू पीक: ३० नोव्हेंबरपर्यंत मुदत.
नारळ व सुपारी पीक: १५ नोव्हेंबरपर्यंत मुदत.
स्वयंचलित हवामान केंद्रांद्वारे नुकसान भरपाई निश्चिती
महसूल मंडळनिहाय स्थापित करण्यात आलेल्या स्वयंचलित हवामान केंद्रांवर (Automatic Weather Stations) पर्जन्यमान, तापमान, वाऱ्याचा वेग आणि हवेतील आर्द्रता इत्यादी हवामानविषयक नोंदी स्वयंचलितपणे घेतल्या जातात. या केंद्रांद्वारे गोळा केलेल्या आकडेवारीच्या आधारे, शासन निर्णयामध्ये निर्धारित केलेल्या कालावधीत हवामान धोके लागू झाल्यानंतर विमाधारक शेतकऱ्यांना नियमानुसार नुकसान भरपाई दिली जाते.
पिकाची नोंदणी आणि अर्ज करण्याची प्रक्रिया
या योजनेत सहभाग घेण्यासाठी शेतकऱ्यांनी खालील बाबींची पूर्तता करणे बंधनकारक आहे:
शेतकरी ओळखपत्र नोंद: ‘ॲग्रीस्टॅक’ (AgriStack) अंतर्गत मोबाइल ॲप्लिकेशनमध्ये आपल्या फळपिकाची नोंद करणे बंधनकारक आहे.
जिओ टॅगिंग फोटो: विमा अर्ज करताना फळबागेचा जिओ टॅगिंग (Geo-tagging) असलेला अचूक फोटो संबंधित विमा पोर्टलवर अपलोड करणे अनिवार्य आहे.
विमा हप्ता भरण्याचे माध्यम: या योजनेचा हप्ता ‘आपले सरकार सेवा केंद्र’, संबंधित बँक किंवा अधिकृत www.pmfby.gov.in या संकेतस्थळावर ऑनलाइन पद्धतीने भरता येईल.
