सख्ख्या भावामध्ये आणि दीर-भावजय यांच्यात घडल्या दोन स्वतंत्र घटना; नाटे सागरी पोलीस ठाण्यात अदखलपात्र गुन्ह्यांची नोंद
राजापूर: Rajapur Family Dispute या प्रकरणाअंतर्गत राजापूर तालुक्यातील होळी परिसरात किरकोळ कारणांवरून एकाच कुटुंबातील नात्यांमध्ये संघर्ष होऊन मारहाण आणि जीवे मारण्याच्या धमक्या दिल्याच्या दोन स्वतंत्र घटना समोर आल्या आहेत. मंगळवारी (११ नोव्हेंबर) रात्री साडेदहा वाजण्याच्या सुमारास घडलेल्या या घटनांमध्ये सख्ख्या भावाने भावाला, तर दिराने भावजयीला मारहाण करून अश्लील शिवीगाळ केल्याचा आरोप करण्यात आला आहे. या दोन्ही प्रकरणी नाटे सागरी पोलीस ठाण्यात परस्परविरोधी अदखलपात्र गुन्ह्यांची नोंद करण्यात आली आहे.
मिळालेल्या माहितीनुसार, पहिली घटना मंगळवारी (११ नोव्हेंबर) रात्री साडेदहा वाजण्याच्या सुमारास होळी येथील रस्त्यावर घडली. समीर विजय शिरवडकर (वय ४५) हे आपल्या पाळीव कुत्र्याला फिरवत असताना त्यांचे भाऊ शशांक विजय शिरवडकर (वय ३८) हे मोबाईलवर कोणाशी तरी बोलत होते. या संभाषणादरम्यान ‘माझ्याकडे हत्यार आहे…’ असे वाक्य समीर यांच्या कानावर पडले. यावरून समीर यांनी शशांक यांच्याकडे कोणाशी बोलत आहेस आणि तुझ्याकडे कोणते हत्यार आहे, अशी विचारणा केली. मात्र, या विचारण्याचा राग अनावर झाल्याने शशांक यांनी समीर यांना हाताच्या थापटाने मारहाण करत अश्लील शिवीगाळ केली आणि जीवे ठार मारण्याची धमकी दिली, अशी तक्रार समीर यांनी पोलिसांकडे दिली आहे.
दीर-भावजय वादातून दुसरी तक्रार दाखल
दुसरी घटना याच दिवशी रात्री साडेदहा वाजण्याच्या सुमारास होळी भंडारवाडी येथे घडली. साक्षी शशांक शिरवडकर (वय ४०) या घरी असताना त्यांचे दीर समीर विजय शिरवडकर यांनी कोणतेही कारण नसताना आई-बहिणीवरून अश्लील शिवीगाळ केली. तसेच हाताच्या थापटाने मारहाण करून जीवे ठार मारण्याची धमकी दिल्याचे साक्षी यांनी आपल्या तक्रारीत नमूद केले आहे. या प्रकरणी साक्षी यांनी १२ नोव्हेंबर रोजी नाटे सागरी पोलीस ठाण्यात तक्रार दाखल केली.
दोन्ही तक्रारींची दखल घेत नाटे सागरी पोलिसांनी संबंधित व्यक्तींविरुद्ध भारतीय न्याय संहिता २०२३ मधील कलम ३५२, ३५१(२)/३५१(३) आणि ११५(२) अन्वये स्वतंत्र अदखलपात्र गुन्ह्यांची नोंद केली आहे. किरकोळ कारणावरून एकाच कुटुंबात घडलेल्या या मारहाण आणि धमक्यांच्या घटनांमुळे होळी परिसरात उलटसुलट चर्चांना उधाण आले आहे.
