तांत्रिक नियमामुळे अडकलेले पासपोर्ट अमेरिकन दूतावासाच्या विशेष परवानगीने मिळाले; रत्नागिरी जिल्हा परिषदेचे विद्यार्थी अमेरिकेसाठी रवाना
रत्नागिरी: Ratnagiri ZP Students NASA Tour या महत्त्वपूर्ण अभ्यास दौऱ्यावर ऐनवेळी आलेले मोठे विघ्न राज्याचे उद्योग मंत्री तथा रत्नागिरी जिल्ह्याचे पालकमंत्री उदय सामंत यांच्या तत्पर हस्तक्षेपामुळे टळले आहे. १२ डिसेंबर रोजी रात्री १०.३० च्या विमानाने अमेरिकेला रवाना होणाऱ्या रत्नागिरी जिल्हा परिषद शाळांतील गुणवंत विद्यार्थ्यांच्या पासपोर्ट वितरणात तांत्रिक नियमामुळे मोठी अडचण निर्माण झाली होती. मात्र, पालकमंत्र्यांनी अवघ्या काही तासांत हा पेच मार्गी लावल्याने सर्व विद्यार्थ्यांचे अमेरिकेसाठी यशस्वी उड्डाण झाले.
रत्नागिरी जिल्हा परिषदेच्या माध्यमातून सलग चौथ्या वर्षी २६ विद्यार्थी (१४ मुली व १२ मुले) आणि अधिकारी १२ डिसेंबर रोजी रात्री १०.३० च्या विमानाने अमेरिकेला रवाना झाले. या संपूर्ण दौऱ्याची विमानाची तिकिटे, अमेरिकेतील हॉटेल बुकिंग आणि नासामधील सर्व नियोजन यापूर्वीच पूर्ण झाले होते.
नेमकी काय अडचण आली होती?
१२ डिसेंबर रोजी सकाळी व्हिसा मंजूर झालेले पासपोर्ट ताब्यात घेण्यासाठी विद्यार्थी आणि अधिकारी संबंधित केंद्रावर गेले होते. त्यावेळी नवीन नियमानुसार प्रत्यक्ष पालक सोबत असल्याशिवाय अल्पवयीन मुलांचे पासपोर्ट दिले जाणार नाहीत, असे सांगण्यात आले. याआधीच्या तीनही दौऱ्यांमध्ये असा कोणताही नियम नसल्याने प्रशासनासमोर मोठा पेच निर्माण झाला. दौऱ्यातील २३ मुलांचे पालक तात्काळ तिथे उपलब्ध नसल्याने संपूर्ण दौराच धोक्यात येतो की काय, अशा चिंतेने विद्यार्थी आणि अधिकारी हवालदिल झाले होते.
पालकमंत्र्यांची तत्परता आणि सुटकेचा निश्वास
ही गंभीर बाब तातडीने पालकमंत्री उदय सामंत यांच्या कानावर घालण्यात आली. परिस्थितीचे गांभीर्य ओळखून सामंत यांनी क्षणाचाही विलंब न लावता सूत्रे हलवली. त्यांनी तात्काळ ‘व्हीएफएस ग्लोबल’ (VFS Global) कार्यालयाशी संपर्क साधून त्यांच्यामार्फत अमेरिकन दूतावासाकडे (US Embassy) विशेष परवानगीसाठी तातडीचा अर्ज सादर करवून घेतला.
उदय सामंत यांच्या पाठपुराव्यामुळे अमेरिकन दूतावासानेही या विनंतीला तात्काळ सकारात्मक प्रतिसाद देत विशेष परवानगी दिली. परिणामी, अवघ्या काही तासांतच सर्व विद्यार्थ्यांचे व्हिसा स्टॅम्प झालेले पासपोर्ट प्रशासनाच्या ताब्यात सुखरूप मिळाले. या यशस्वी मध्यस्थीमुळे अधिकारी, विद्यार्थी आणि पालकांनी मोठा सुटकेचा निश्वास टाकला. ग्रामीण भागातील विद्यार्थ्यांचे परदेश वारीचे आणि अंतराळ संशोधनाचे स्वप्न भंगू न देता, पालकमंत्र्यांनी दाखवलेल्या या संवेदनशील आणि तत्पर कार्यशैलीचे सर्व स्तरांतून कौतुक होत आहे.
