रत्नागिरी | प्रतिनिधी
रत्नागिरी शहराचे वैभव आणि हजारो भक्तांचे श्रद्धास्थान असलेल्या श्री रत्नागिरीच्या राजाच्या चरणी ‘रत्नागिरी खबरदार’चे संपादक श्री. हेमंत वणजु हे नुकतेच दर्शनासाठी लीन झाले. गणेशोत्सवाच्या या मंगलमय वातावरणात, मंडळाच्या वतीने त्यांची रत्नागिरी जिल्हा सहकारी बोर्डाच्या अध्यक्षपदी निवड झाल्याबद्दल शाल, श्रीफळ आणि पुष्पगुच्छ देऊन त्यांचा भव्य सत्कार करण्यात आला. या वेळी मंडळाचे पदाधिकारी आणि कार्यकर्ते मोठ्या संख्येने उपस्थित होते.
रत्नागिरी शहरातील मध्यवर्ती अशा मारुती मंदिर सर्कल येथे श्री रत्नागिरीचा राजा सार्वजनिक गणेशोत्सव मंडळाच्या वतीने दरवर्षी मोठ्या उत्साहात गणेशोत्सवाचे आयोजन केले जाते. ‘भक्तांच्या हाकेला धावणारा आणि नवसाला पावणारा राजा’ अशी या गणरायाची ख्याती असून, दर्शनासाठी केवळ रत्नागिरीच नव्हे, तर संपूर्ण जिल्ह्यातून भाविक अलोट गर्दी करतात. यावर्षीही गणेशोत्सवाच्या पार्श्वभूमीवर विविध धार्मिक आणि सांस्कृतिक कार्यक्रमांचे आयोजन करण्यात आले आहे.
राज्याचे उद्योगमंत्री उदय सामंत आणि आमदार किरणशेठ सामंत यांच्या कुशल मार्गदर्शनाखाली हे मंडळ केवळ उत्सव साजरा करण्यापुरते मर्यादित न राहता, वर्षभर विविध सामाजिक उपक्रम राबवत असते. त्यामुळे या मंडळाने शहरात एक वेगळी ओळख निर्माण केली आहे.
‘रत्नागिरी खबरदार’चे संपादक हेमंत वणजु यांनी नुकतीच श्री रत्नागिरीच्या राजाच्या मूर्तीचे दर्शन घेऊन आशीर्वाद घेतले. यावेळी त्यांची रत्नागिरी जिल्हा सहकारी बोर्डाच्या अध्यक्षपदी निवड झाल्याबद्दल मंडळाच्या वतीने त्यांचा विशेष सत्कार करण्यात आला. याप्रसंगी मंडळाचे श्री. परेश सावंत, श्री. दीपक पवार, श्री. मनीष मोरे, श्री. अमरीश पावसकर, श्री. अभी दुडे, श्री. प्रवीण साळवी, श्री. राकेश साळवी, श्री. रोहित सावंत, श्री. विनायक नागवेकर यांच्यासह मंडळाचे अन्य कार्यकर्ते आणि पदाधिकारी उपस्थित होते. या सत्कारामुळे हेमंत वणजु यांनी मंडळाचे आभार मानले.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
08:26 31-08-2025
