वाघनखं खरी वाटत नसतील तर एकदा वापरुन बघा, कोथळा बाहेर निघेल; संजय शिरसाटांचं विरोधकांना प्रत्युत्तर

मुंबई : लंडनहून आणलेली बहुप्रतिक्षीत वाघनखं (Wagh Nakh) साताऱ्याच्या वस्तुसंग्रहालयात ठेवण्यात आली आहेत. आज मुख्यमंत्री आणि दोन्ही उपमुख्यमंत्री यांच्या उपस्थितीत साताऱ्यात भव्य दिव्य सोहळा पार पडत आहे.

ही वाघनखं उद्यापासून सर्वसामान्य नागरिकांना पाहता येणार आहे. सकाळी १० ते ११ या वेळेत केवळ विद्यार्थ्यांना ही वाघनखं पाहण्याची परवानगी असेल. यासाठी केवळ दहा रुपयांचं तिकीट ठेवण्यात आल्याची माहिती जिल्हाधिकारी जितेंद्र डीडी यांनी दिली. तर या वाघनखांना आणण्यावरून राज्यातील राजकारण चांगलंच रंगलं आहे. या मुद्द्यावरून सत्ताधारी आणि विरोधक यांच्यात आरोप प्रत्यारोप सुरू असल्याचं दिसून येत आहे.

विरोधकांना उत्तर देताना शिवसेना शिंदे गटाचे नेते आणि मंत्री संजय शिरसाट (Sanjay Shirsat) यांनी विरोधकांना कुठल्याही आनंदात सहभागी व्हायचं नाही. वाघनखं ट्रकवर आणण्या इतकी ही एवढी मोठी नाहीत, महाराजांचा बहुमुल्य ठेवा राज्यात आला आहे, याचा हेवा वाटायला हवा. याचं राजकारण नका करू, तुम्हाला सन्मान करता येत नसेल तर अपमान तरी करू नका असं म्हणत उत्तर दिलं आहे. तर वाघनखं (Wagh Nakh) ही शिवरायांची (Chhatrapati Shivaji Maharaj) नाहीत याबाबत बोलताना खरी वाघनंख नाहीत तर एकदा जवळून बघा वापरून बघा घ्या कोथळा बाहेर निघेल असंही ते पुढे म्हणालेत.

वाघनखं भारतात आणण्यासाठी किती झाला खर्च?
वाघ नखं भारतात आणण्यासाठी कोट्यावधी रुपयांचा खर्च करण्यात आल्याचा प्रश्न उपस्थित करण्यात आला होता. यावर आपल्या अधिवेशनाचा एका दिवसाचा खर्च जेवढा आहे त्याच्या कितीतरी पट कमी खर्च झाला असल्याचे मंत्री सुधीर मुनगंटीवार (Sudhir Mungantiwar) म्हणाले. वाघनखं आणण्यासाठी जाण्याचा आणि येण्याचा 14 लाख 8 हजार रुपये खर्च झाला असल्याचे त्यांनी सांगितले.

लंडनहून आणली गेलेली वाघनखं शिवरायांची नाहीत?
लंडनहून आणली गेलेली वाघनखं (Wagh Nakh) ही शिवरायांची (Chhatrapati Shivaji Maharaj) नाहीत असा दावा इतिहासकार इंद्रजीत सावंत गेल्या अनेक महिन्यांपासून करत होते. त्यांच्या या दाव्याला लंडनच्या व्हिक्टोरिया अँड अल्बर्ट म्युझियमनंही पुष्टी दिल्याचं त्यांचं म्हणणं आहे. ही वाघनखं छत्रपती शिवाजी महाराजांची आहेत यासाठी कोणताही पुरावा नाही असं पत्र या म्युझियमनं इंद्रजित सावंतांना पाठवल्याचं त्यांनी म्हटलं आहे. स्वतः इंद्रजित सावंतांनी ८ जुलै रोजी पत्रकार परिषद घेत माहिती दिली आहे. लंडनहून आणलेली बहुप्रतिक्षीत वाघनखं साताऱ्याच्या वस्तुसंग्रहालयात ठेवण्यात आली आहेत. ही वाघनखं उद्यापासून सर्वसामान्य नागरिकांना पाहता येणार आहे.

दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
04:10 PM 19/Jul/2024