दिल्लीनंतर आता ११ जून रोजी पुण्यात ठिय्या; अभिजित दीपके यांनी पुकारला केंद्र सरकारविरोधात एल्गार
पुणे: देशभरातील विविध स्पर्धा परीक्षा, भरती प्रक्रिया आणि प्रवेश परीक्षांमध्ये झालेल्या कथित गैरव्यवहारांविरोधात आता कॉक्रोच जनता पार्टी (CJP) पूर्णपणे आक्रमक झाली आहे. परीक्षा व्यवस्थेतील या गोंधळामुळे केंद्रीय शिक्षण मंत्री धर्मेंद्र प्रधान यांनी आपल्या पदाचा तात्काळ राजीनामा द्यावा, अशी मागणी करत देशव्यापी आंदोलन छेडण्याचा इशारा कॉक्रोच जनता पार्टीचे संस्थापक अभिजित दीपके यांनी दिला आहे. पुण्यातील पत्रकार भवन येथे बुधवारी आयोजित करण्यात आलेल्या पत्रकार परिषदेत ते बोलत होते. देशातील परीक्षा व्यवस्थेतील कथित भ्रष्टाचार, पेपरफुटी आणि वाढत्या अनियमिततेमुळे आज लाखो विद्यार्थ्यांचे आणि स्पर्धा परीक्षार्थींचे भविष्य अंधारात सापडले असल्याचा थेट आरोप दीपके यांनी यावेळी केला.
जंतर-मंतरनंतर आता सावित्रीबाई फुले पुणे विद्यापीठात ठिणगी पत्रकार परिषदेत आंदोलनाची पुढील रणनीती स्पष्ट करताना अभिजित दीपके यांनी सांगितले की, या देशव्यापी आंदोलनाचा पहिला टप्पा ६ जून रोजी नवी दिल्लीतील ऐतिहासिक जंतर-मंतर येथे यशस्वीपणे पार पडला आहे. आता या आंदोलनाचा दुसरा टप्पा ११ जून रोजी पुण्यात होणार असून, सावित्रीबाई फुले पुणे विद्यापीठ (SPPU) आवारात शांततापूर्ण मार्गानं आंदोलन करण्यात येणार आहे. केंद्र सरकारने विद्यार्थ्यांच्या या न्याय्य मागण्यांकडे दुर्लक्ष केल्यास, आगामी काळात देशभरात व्यापक आणि तीव्र जनआंदोलन उभारले जाईल, असा इशाराही त्यांनी दिला.
NEET आणि SSC GD परीक्षांमधील त्रुटींवरून सरकारवर निशाणा देशातील प्रमुख परीक्षांच्या विश्वासार्हतेवर प्रश्नचिन्ह उपस्थित करताना दीपके म्हणाले की, सध्या SSC GD, CBSE, आणि NEET यांसारख्या राष्ट्रीय पातळीवरील परीक्षा आणि विविध सरकारी भरती प्रक्रियांमध्ये सातत्याने मोठे वाद निर्माण होत आहेत. वारंवार होणारी पेपरफुटी, निकालांमधील गंभीर त्रुटी आणि भरती प्रक्रियेतील पारदर्शकतेचा अभाव यांमुळे प्रामाणिकपणे अभ्यास करणाऱ्या विद्यार्थ्यांमध्ये तीव्र असंतोष पसरला आहे. या सर्व प्रकारांमुळे गुणवंत विद्यार्थ्यांचे करिअर आणि आयुष्य धोक्यात आले असून, या घोटाळ्यांमागे असलेल्या मुख्य सूत्रधारांवर कठोर कायदेशीर कारवाई होणे अत्यंत आवश्यक आहे.
“सामान्य कर्मचाऱ्यावर कारवाई होते, मग मंत्र्यांवर का नाही?” प्रशासकीय व्यवस्थेच्या दुटप्पी भूमिकेवर बोट ठेवताना अभिजित दीपके यांनी संतप्त सवाल केला. जेव्हा एखाद्या छोट्या सरकारी कर्मचाऱ्याकडून साधी चूक होते, तेव्हा यंत्रणा त्याच्यावर तात्काळ निलंबनाची किंवा दंडात्मक कारवाई करते. मात्र, दुसरीकडे लाखो विद्यार्थ्यांच्या भवितव्याशी खेळणाऱ्या एवढ्या मोठ्या आणि गंभीर प्रकरणांमध्ये अद्याप कोणाचीही जबाबदारी निश्चित झालेली दिसत नाही. त्यामुळे केंद्रीय शिक्षण मंत्र्यांनी आता कोणतीही टाळाटाळ न करता तात्काळ नैतिक जबाबदारी स्वीकारून आपल्या मंत्रिपदाचा राजीनामा दिला पाहिजे, अशी आग्रही मागणी दीपके यांनी केली.
पुण्यानंतर लखनौ, जयपूर आणि अमृतसरमध्ये धरणे आंदोलन एकट्या व्यक्तीचा आवाज शासन दाबून टाकू शकते, मात्र जेव्हा लाखो तरुण एकत्र येतात तेव्हा त्यांचा आवाज दाबणे कोणालाही शक्य नाही, असे सांगत दीपके यांनी देशातील युवकांना आणि परीक्षार्थींना या आंदोलनात मोठ्या संख्येने सहभागी होण्याचे आवाहन केले आहे. पुण्यात होणाऱ्या या आंदोलनाला विद्यार्थ्यांचा मोठा प्रतिसाद लाभेल, असा विश्वास त्यांनी व्यक्त केला. पुण्याच्या आंदोलनानंतर या मोहिमेचा विस्तार केला जाणार असून लखनौ, जयपूर, अमृतसरसह देशातील इतर प्रमुख शहरांमध्येही आंदोलने केली जातील. विद्यार्थ्यांच्या या गंभीर प्रश्नांकडे राष्ट्रीय तसेच आंतरराष्ट्रीय स्तरावर लक्ष वेधण्यासाठी CJP कडून विशेष प्रयत्न केले जाणार आहेत. त्यामुळे आता ११ जून रोजी पुण्यात होणाऱ्या या आंदोलनाकडे संपूर्ण राज्यातील विद्यार्थी, पालक आणि शैक्षणिक क्षेत्राचे डोळे लागले आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
17:19 10-06-2026
