२०३० पर्यंत भारतातील गिग वर्कफोर्स २.३५ कोटींवर पोहोचण्याचा अंदाज; एआय (AI) क्षेत्रात ६ लाखांहून अधिक भारतीयांचा वाटा
नवी दिल्ली:
India Skills Report 2026 (इंडिया स्किल्स रिपोर्ट २०२६): देशातील विविध राज्यांमध्ये दरवर्षी नवनवीन उद्योग-व्यवसाय सुरू होऊन रोजगाराच्या लाखो संधी निर्माण होत असतात. या पार्श्वभूमीवर, देशात तरुणांना सर्वाधिक रोजगार उपलब्ध करून देण्यात कोणते राज्य आघाडीवर आहे, याची अधिकृत आकडेवारी जाहीर झाली आहे. नुकत्याच प्रसिद्ध झालेल्या ‘इंडिया स्किल्स रिपोर्ट २०२६’ नुसार, रोजगाराच्या संधी उपलब्ध करून देण्यात उत्तर प्रदेश हे राज्य संपूर्ण देशात पहिल्या क्रमांकावर राहिले आहे.
महाराष्ट्र देशात दुसऱ्या क्रमांकावर; कर्नाटक तिसऱ्या स्थानी
इंडिया स्किल्स रिपोर्ट २०२६ मधील आकडेवारीनुसार, रोजगाराच्या बाबतीत महाराष्ट्र राज्य देशात दुसऱ्या स्थानावर आहे, तर कर्नाटकने तिसरा क्रमांक पटकावला आहे. देशात सर्वाधिक रोजगार आणि कौशल्यपूर्ण संधी निर्माण करणाऱ्या अव्वल १० राज्यांची यादी खालीलप्रमाणे आहे:
- उत्तर प्रदेश
- महाराष्ट्र
- कर्नाटक
- केरळ
- पंजाब
- मध्य प्रदेश
- पश्चिम बंगाल
- राजस्थान
- अरुणाचल प्रदेश
- जम्मू आणि काश्मीर
India Skills Report 2026: देशाची एकूण रोजगारक्षमता ५६.३५ टक्क्यांवर
अहवालातील नोंदीनुसार, भारताची एकूण तरुण रोजगारक्षमता (Employability) २०२५ मधील ५४.८१ टक्क्यांवरून वाढून २०२६ मध्ये ५६.३५ टक्क्यांवर पोहोचली आहे. या सकारात्मक वाढीवरून देशातील तरुण वर्ग बदलत्या उद्योग जगतानुसार आणि रोजगारासाठी आवश्यक असणाऱ्या कौशल्यांनुसार स्वतःला वेगाने अपडेट करत असल्याचे स्पष्ट दिसून येत आहे.
२०३० पर्यंत २.३५ कोटी गिग वर्कफोर्सचा अंदाज; टियर-२ अन् टियर-३ शहरे ठरतातय पॉवरहाऊस
तंत्रज्ञान आणि लवचिक कार्यपद्धतींच्या युगात भारतातील ‘गिग इकॉनॉमी’चा (Gig Economy) विस्तार अत्यंत वेगाने होत आहे. या अहवालानुसार, येत्या २०३० पर्यंत देशातील ‘गिग वर्कफोर्स’ची (कंत्राटी व फ्रीलान्स कामगार) संख्या २.३५ कोटींच्या (२३.५ दशलक्ष) पार पोहोचण्याचा अंदाज व्यक्त करण्यात आला आहे.
विशेष म्हणजे, देशातील टियर-२ आणि टियर-३ (लहान व मध्यम) शहरे ही आता रोजगार आणि कौशल्य विकासाची प्रमुख केंद्रे म्हणून उदयास येत असून, त्यामुळे ग्रामीण व निमशहरी भागातील तरुणांना करिअरच्या नव्या संधी उपलब्ध होत आहेत.
एआय (AI) क्षेत्रात भारताची ताकद वाढली; ६ लाखांहून अधिक व्यावसायिक कार्यरत
आर्टिफिशियल इंटेलिजन्स (AI) म्हणजेच कृत्रिम बुद्धिमत्तेच्या क्षेत्रात जागतिक स्तरावर भारताने आपले स्थान अधिक भक्कम केले आहे. अहवालानुसार, जागतिक एआय प्रतिभेमध्ये भारताचा वाटा तब्बल १६ टक्के असून देशात ६ लाखांहून अधिक एआय व्यावसायिक (AI Professionals) कार्यरत आहेत. सध्या नोकरीच्या संधी उपलब्ध करून देण्यात तंत्रज्ञान, बँकिंग-वित्तीय सेवा आणि विमा (BFSI), उत्पादन (Manufacturing), नवीकरणीय ऊर्जा आणि आरोग्यसेवा ही क्षेत्रे आघाडीवर आहेत.
हा अहवाल ईटीएसने (ETS) कॉन्फेडरेशन ऑफ भारतीय उद्योग (CII), ऑल इंडिया कौन्सिल फॉर टेक्निकल एज्युकेशन (AICTE) व इतर प्रमुख संस्थांच्या सहकार्याने तयार केला आहे. यासाठी ७ प्रमुख उद्योगांमधील १ लाखांहून अधिक उमेदवार आणि १००० पेक्षा जास्त संस्थांच्या माहितीचे विश्लेषण करण्यात आले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:49 19-08-2026
