गोंदिया / भंडारा : कोरोना प्रतिबंधक लस (Corona Vaccine) घेतल्यानंतर देशातील नागरिकांमध्ये कर्करोग (कॅन्सर) आणि हृदयविकाराच्या झटक्याचे (हार्ट अटॅक) प्रमाण मोठ्या प्रमाणावर वाढले आहे, असा खळबळजनक आणि गंभीर आरोप काँग्रेसचे ज्येष्ठ नेते तथा आमदार नाना पटोले यांनी केला आहे. गोंदिया जिल्ह्यातील आमगाव येथे आयोजित एका जाहीर कार्यक्रमात नागरिकांना संबोधित करताना त्यांनी हे वक्तव्य केले.
Nana Patole Corona Vaccine Statement: कोरोना लशीचे घातक परिणाम समोर आल्याचा दावा
नाना पटोले आपल्या भाषणात म्हणाले की, “देशात कोरोना महामारीच्या काळात मोठ्या प्रमाणावर लसीकरण मोहीम राबवण्यात आली. मात्र, या लशीचे अत्यंत घातक परिणाम आता समोर येऊ लागले आहेत. कोरोना लस घेतलेल्या नागरिकांमध्ये अचानक हृदयविकाराचा झटका येऊन मृत्यू होण्याचे तसेच कर्करोगासारखे गंभीर आजार जडण्याचे प्रमाण वेगाने वाढले आहे.” केंद्र सरकारच्या तत्कालीन आरोग्य धोरणांवर निशाणा साधत त्यांनी या गंभीर मुद्द्याकडे सर्वांचे लक्ष वेधले.
भंडाऱ्यात शिंदेंच्या आमदाराला काँग्रेसची खुली ऑफर
दुसरीकडे, भंडारा जिल्ह्यातील महायुतीमधील भाजप आणि शिवसेना यांच्यातील अंतर्गत वादाचा फायदा उठवत काँग्रेसने सत्ताधाऱ्यांना मोठा राजकीय धक्का दिला आहे. काँग्रेसचे भंडारा जिल्हाध्यक्ष मुकुंद साखरकर यांनी शिंदे गटाचे आमदार नरेंद्र भोंडेकर यांची जाहीर पाठराखण करत त्यांना थेट काँग्रेसमध्ये प्रवेश करण्याची खुली ऑफर दिली आहे.
दहीहंडीच्या कार्यक्रमात बोलताना साखरकर म्हणाले, “विकास कामे करताना महायुतीचेच मित्रपक्ष किंवा कार्यकर्ते जर आमदारांची कोंडी करत असतील, तर त्यांनी बिनधास्त काँग्रेसमध्ये यावे; त्यांचे पक्षात स्वागतच केले जाईल.” खासदार संजय राऊत यांनी भोंडेकर यांच्या मेडिकल कॉलेजच्या मुद्द्याला विरोध केला असताना, साखरकर यांनी मात्र आमदारांनी भंडाऱ्यासाठी आणलेल्या निधीचे जोरदार समर्थन केले. काँग्रेसच्या या ‘मास्टरस्ट्रोक’नंतर आमदार नरेंद्र भोंडेकर काय भूमिका घेतात, याकडे संपूर्ण विदर्भाचे लक्ष लागले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:33 08-09-2026
